Monday, August 07, 2006

قصيدة البتاع

بمناسبة التصريح الرئاسى دى خسارة كبيرة .. خسارة لاسرائيل .. وخسارة للبتاع ده ... اهديكم
احمد فؤاد نجم

يا للي فتحت البتاع
فتحك على مقفول
لأن أصل البتاع
واصل على موصول
فأى شئ في البتاع
الناس تشوف على طول
والناس تموت في البتاع
فيبقي مين مسؤول ؟
وإزاي حتفتح بتاع
في وسط ناس بتقول
بأن هذا البتاع
جاب الخراب مشمول
لأنه حتة بتاع
جاهل
غبي
مخبول
أمر بفتح البتاع
لأنه كان مسطول !
وبعد فتح البتاع
جابوا الهوا المنقول
نكس عشوش البتاع
وهد كل أصول
وفات في غيط البتاع
قام سمم المحصول
وخلا لون البتاع
أصفر
حزين
مهزول
وساد قانون البتاع
ولا عله ولا معلول
فالقاضي بتع البتاع
فالحق ع المقتول
والجهل زاد في البتاع
ولا مقري
ولا منقول
والخوف
سرح في البتاع
خلا الديابه تصول
ويبقي البتاع في البتاع
والناس صايبها ذهول
وأن حد قال دا البتاع
يقولوا له مش معقول
وناس تعيش بالبتاع
وناس تموت بالفول
وناس تنام ع البتاع
وناس تنام كشكول
آدي اللي جابه البتاع
جاب الخراب بالطول
لأنه حتة بتاع
مخلب لراس الغول
باع البتاع بالبتاع
وعشان يعيش على طول
عين حرس بالبتاع
وبرضه مات مقتول

10 Comments:

At 8/15/2006 12:40 PM, Blogger M.Sameer said...

http://www.foolab.org/node/1529

 
At 9/06/2006 12:55 AM, Blogger Vi§ion said...

كويس إنك بتفكر الناس بالشاعر العظيم دة، قصايدة بتجيب من الآخر، و بكلمة بسيطة و عميقة، يا ريت تجيب بقية قصايده.

 
At 9/06/2006 1:55 PM, Blogger فانتوماس said...

vision
اهلا بيك الحقيقة انا مش متابع قوي للشعر انا يمكن اهتماماتي علمية اكثر لكن الحكاية كانت طالبة قوي القصيدة دي بعد التصريح اياه
تحياتي

 
At 9/14/2006 7:19 PM, Blogger MAKSOFA said...

يادي البتتايع اللي ماليه البلد دي علي الفاضي

 
At 2/19/2008 6:37 PM, Anonymous Anonymous said...

طيب يا جماعة البتاع ممكن حد يقول اية هو البتاع بدون ما نلف وندور اصل الببتاع حيرني ومازلت مش عارف اية هو البتاع ..... انا باتكلم بجد نفسي اعرف اية هو البتاع اللي بيقصدة احمد نجم
وشكرا

 
At 2/06/2009 1:41 PM, Anonymous Anonymous said...

انا معجب بالشاعر احمد فؤاد نجم وبيتهيأ لى البتاع ده اكتر من حاجة

 
At 5/11/2009 7:16 PM, Blogger Unknown said...

حبيبي البتاع هو الانفتاح التجاري و المخبول هو انور السادات

 
At 5/11/2009 8:01 PM, Anonymous Anonymous said...

دروس الفوتوشوب

 
At 11/11/2009 4:19 PM, Blogger Unknown said...

أنت تحط أي حاجة في مصر مكان البتاع هتمشى و هو ده المقصود من البتاع

 
At 5/04/2010 4:37 AM, Blogger Unknown said...

ياجماعه اصلكم مش عارفين ان البتاع فى البتاع

 

Post a Comment

<< Home