احنا جدعان قوي
لي صديق احبه كثيرا وهو زميل في العمل ايضا ..ببساطة شديدة دمه خفيف وابن نكته لكن عنده مصيبة جامدة جدا, بصراحة فاكر نفسه ماحصلش عبقري وفلتة زمانه ونابغة , تسأل اللي حواليه يقولوا لك انه مش بيفهم في شغله ومش طموح ومابيحبش يتعلم وبليد و و و
الصراحة خفت علي نفسي لحسن اكون انا كمان حمار وفاكر اني ماحصلتش وفكرت شوية لقيت اني خايف علي البلد كلها لاننا دايما بنبقي فاكرين اننا ماحصلناش - راجع قصة الهرم والحضارة والتاريخ والريادة - وبنطلع في الاخر صفر علي الشمال - طبعا فاكرين صفر المونديال- الحقيقي الموضوع شغلني واستفزني قوي ازاي يبقي الواحد اعمي ومش شايف نفسه خالص ومتخيل نفسه حاجة وكل الناس شايفاه حاجة تانية , الكلام ده علي المستوي الشخصي وايضا علي مستوي البلد
مثال بسيط : وانا بتفرج علي كاس العالم كنت باسمع المعلقين العرب واقارن مستواهم بالمعلقين بتوعنا, فيه واحد منهم بيتقن الالمانية والاسبانية والايطالية بجانب الانجليزية والفرنسية طبعا, تقارن دول ببتوع الستاير والكشري اللي بيدوهم الميكرفونات للتعليق علي الماتشات تتنفخ. الفارق شاسع جدا واكيد المعلق بتاعنا ده شايف انه ماحصلش لكنه غالبا زي صاحبي اللي حكيت عليه في الاول طب ايه الحل مش عارف
مثال اخر : تسمع كلام الناس والمسلسلات العربي تحديدا عن اخلاق الحارة المصرية والاصالة والجدعنة اللي في المصريين وتدور عليها بجد , الحقيقة قليل جدا اللي اتربي اصلا -راجع قصص مرتضي منصور- وتلاحظ ان اكبر مشكلتين عندنا هما التربية والتعليم فنحن ابعد ما نكون عنهما
الخلاصة ازاي الواحد يشوف نفسه صح ؟؟؟ حد عنده اقتراحات ؟؟
posted by فانتوماس @ 2:23 PM
10 comments
10 Comments:
شوف يا عم فانتو
الناس كلها فعلا بتتخيل حاجات خرافيه عن نفسها ومش بتشوف اي حاجه صح عشان كده مشكلتك مالهاش حل زي ما انت شايف نفسك حتصدقها
انا مختلفة معاك فى ناس كتير متميزة ومتواضعه جدا كمان .. لا انكر السلبيات اللى انت اشرت لها، لكن فى المجمل فى ناس الى حد بعيد كويسه
بعدك علي بالي
انا برضه متفق معاكي ان فيه ناس كويسه لكن اعتقد انهم مش كتير لكن السؤال المهم اشوف نفسي بصورتها الحقيقية ازاي دايما تلاقي كلام الناس مختلف عن رأي البني ادم في نفسه انا مش بقصد موضوع الغرور لكن فيه حاجة فى علم النفس اسمها الانكار ان الواحد يمنع نفسه انه يشوف اللي كل الناس شايفاه اعالج الكلام ده ازاي؟
عارف يافنتوماس
مشكلتنا احنا المصريين اننا شعب فهلوي وموش شايفين حد في الدنيا الا نفسنا وفاهمين انناأذكي ناس وافهم ناس و احسن ناس في العالم ،وغيرنا بهايم ومابيفهموش وجهلة ومن هنا بتكون المصيبة ، لأننا في الحقيقة كنا زمان لنا الريادة في كل حاجة لكن دلوقتي اتدحدر بينا الحال ، نقول لية لأننا بقينا محلك سر علشان اقتنعنا لكل اللي وصلنا ليةوغمضنا عيونا عن اللي جاي وازي نطور نفسناورغم كدة لسة بنفتكر نفسنا احسن ناس وعايشين علي الماضي ، فأصبح للبلاد العربية فضائيات احسن مننا ومذيعين مدربين ومؤهلين احسن مننا وبقي عندهم تطور في اليات التعليم والتعلم احسن مننا ،كذلك الدول الخليجية اصبحت باموالها تستورد التكنولوجيا،ولم تعد الجامعات المصرية هدفا لهم من اجل تعليم اولادهم لأن عندهم دلوقتي احسن جامعات زي ما استودوا ليها الأمكانيات التكنولوجية استودوا لها المناهج والمدرسين الأجانب من امريكا وكندا وانجلترا، حتي الأستاذ العربي اللي بيدرس فيها يبكون عندة جنسية من دول ، الأنجليزي عندهم بيرضعوة في البزازة حتي في المدارس الحكومية
واحنا لسة بيناقشوا عادل اللي بقي لة اكتر من اربعين سنة بيأكل الفول في كتاب التربية والتعليم
احنا مناهجنا المدرسية عايزة تتغير علشان تواكب التغيرات في العالم وحتي يصبح الخريج عندنا مؤهل لسوق العمل بأكتساب اللغات والمهارات
مكسوفه
تحليل رائع يا فندم عارفه اني دايما اقول مشكلتنا في التعليم ثم التعليم ثم التعليم. لكن النقطة التي تؤرقني هي حتة الفهلوة ازاي ابقى فاكر نفسي ماحصلتش واطلع في الاخر تبع ذوات الاربع واضح ان البني ادم عنده قدرة غريبة علي خداع نفسه زي واحد يحب واحدة مش من مستواه ومافيش تكافؤ بينهم والناس كلها شايفه عبطه وهو فاهم نفسه ولد ماحصلش وهو فعلا ماحصلش في العبط
أتفق معك تماما الا أنني أختلف معك في أن البني آدم لدية قدرة غريبة علي خداع نفسة ليس اي بني ادم
فقط هو البني آدم المصري
مكسوفة
مممممممم مش عارف المصري بس ولا البني ادم عامة. اعتقد انه عامة لاني بشتغل احيانا كثيرة مع اجانب, نسبة الصدق فيهم اعلي مننا طبعا لكن برضة بتلاقي فيهم بني ادميين عندهم هبل وخاصة الهنود
Great site lots of usefull infomation here.
»
عزيزي .. أغلب هذه السلبيات تجدها لدى السادة الفقراء الجدد ، أو السوقة الجدد ، بما أن هناك فرق رهيب بين الفقراء الذين قدموا قمم مصر في الثقافة والعلوم والفنون وبين السوقة ، الذين بنوا على كواهلهم جمهوريات العشوائيات داخل المدن الكبرى ، وتمددوا وصارت لهم لغتهم وشتائمهم وموسيقاهم المميزة (راجع مقطوعة المولد والواو الواو الواو) ، قد يصنفهم البعض - بمن فيهم الكؤباء اليساريين- كبروليتاريا (صححني إن أخطأت) لكن لا تبدو سلوكيات الكثيرين منهم كسلوكيات شغيلة..
هؤلاء ، فضلاً عن شرائح واسعة من الفقراء القدامى ، وسكان الأحياء الشعبية العريقة ، صارت أخلاق ولاد البلد إكليشيه آخر لا يظهر ما يبطنه ، ذهبت الشهامة والجدعنة إلى غير رجعة وحلت بدلاً منها صفات أخرى مختلفة تماماً..
الأنونوميس الأولاني : جايز يكون كلامك صح ، لكنك لو اصطدمت ، برضه حيتهيألك؟ وحتصدق إيه بالصلاة على النبي؟ اللي بيتحشى بيه عقلك في المسلسلات والأفلام عن أحباب الله السوقة الجدد أنصار الفقر حشمة ، ولا أرض الواقع اللي بتتهبد عليها كل يوم؟
اللي بأقوله لا هو عنصرية ولا بورجوازية .. أنا بأقول اللي أنا شايفه .. ورزقي على رب العباد..
قلم جاف
كلامك جميل وانا فعلا بشوف ان فيه انحدار عام سببه الاساسي في رأي قلة الثقافة والتعليم وبالمناسبة صاحبي اللي بتكلم عنه غني ومن مصر الجديدة بس برضه شايف نفسه غلط. تحياتي.
Post a Comment
<< Home