Monday, June 12, 2006

الشرقاوي والشاعر وغيرهم

الشرقاوي والشاعر وغيرهم

يجلس صاحب المقام الرفيع في امن الدولة في مكتبه وهو يتابع الموقف في اثناء المظاهرات ويضرب تليفونه الخاص وعلي الطرف الاخر صوت نسائي مثير
شوشيت : الو ازيك يا رورو عامل ايه النهارده
عبد الجبار : انا زي الفل عندي بس شوية مشاكل مع العيال الصياع بتوع المظاهرات بس ودينى لها...هم النهارده
شوشيت (ضحكة): بس ما تنساش تاخد الاقراص اياها عشان تعرف
عبد الجبار : وبعدين معاكي ماكنتش مرة يعني .. قولت لك اني كنت مضغوط قوي يومها
شوشيت : طيب ماتزعلش يا رورو انا عايزاك في خدمة
عبد الجبار : اؤمري انا خدام تراب رجليكي الحلويين ااااخ
شوشيت : نزلت الصبح لقيت جاري الغلس راكن عربيته جنب عربيتي وقافل عليها الظاهر انه بيعاكسني
عبد الجبار : انا حطلع دين امه. خليك معايا على التليفون
(يفتح اللاسلكى)
عبد الجبار : الو الو عمليات المرور .. عبد الجبار امن الدولة حول
اللاسلكي : اؤمر معاليك يا باشا
عبد الجبار : عايز كل العربيات اللى فى شارع 7 فى المعادي اللي راكنه صف تانى تتشال احتمال يكون فيه زيارة سرية في الشارع ده... خلال ربع ساعة بس مفهوم
اللاسلكي : اوامر معاليك يا باشا
عبد الجبار : شفتي بقي يا ستي ... قوليلي اسمه ايه وانا حاطلعلك عينيه
شوشيت : بص ادبه بس عشان يحرم مش لازم يختفي زي الجار اللي فات, العمارة حتفضي كده ضحكة رقيعة
عبد الجبار(تلمع عيناه بجنون) : انت عارفه انه بكلمة مني اقدر اهز البلد دي كلها . قوليلي النهارده الخميس وانا عايز اعدي عليكي
شوشيت : انت تنور خلص علي الراجل ده وتعال ...(اصوات سارينة) على فكرة بتوع المرور جم وابتدوا يرموا العربيات اهم ... انا شايفاهم من البلكونه دعكوا 3 عربيات ورموهم فى الخرابة اللي ورا وبينهم عربية الحيوان مرسي يا شيرى
عبد الجبار : عشان تعرفي غلاوتك ...قوليلي اسم البقف ده ايه . ده امه داعيه عليه
شوشيت : اسمه عبد العزيز محمد الشرقاوي
(تليفون احمر يرن امام عبد الجبار)
عبد الجبار : طيب طيب يا شوشو انا حانفخه واجيلك باليل مووه
شوشيت : مووووووووووووووووه تقفل الخط
عبد الجبار : ايوه يا باشا اوامر معاليك
الصوت : انت يا حيوان قاعد علي ط..ظك وسايب البلد تضرب تقلب
عبد الجبار : لا يا باشا ازاي ده حتي رجالتي جابولى اسماء الناس بتوع المظاهرات النهارده وجاري مراقبتهم بس سعادتك عارف ان احنا مش عاوزين نظهر قوي واحنا بنؤدبهم عشان الصحافة والتصوير
الصوت : .س ام الصحافة اطحنهم كلهم احنا بنحمي البلد من الاوساخ دول ... قولي أي اسم كده من المحرضين دول عشان لو حد سألني ابقى عارف ارد
عبد الجبار (يفكر) : اسمه محمد الشرقاوي يا باشا.. ده بأه اكتر واحد بيضايق النظام وبيقفل عليه ... تخيل يا باشا النظام ماقدرش ينزل الصبح عشان الحيوان ده بيعاكسه ...
الصوت : يا نهار ابوه اسود .. انفخوه ...وادينى التمام يقفل الخط
عبد الجبار : اوامر وتعليمات الباشا ... (يفتح اللاسلكي) انت يا بغل ياللي نايم علي ودانك (صوت ضرب ورزع وهتافات)
صوت : تعليمات الباشا
عبد الجبار : نقولنا أي حد في المظاهرة يكون فى اسمه الشرقاوي وانفخوه
صوت : اوامر سعادتك ولو مافيش حد فى المظاهرة اسمه الشرقاوي نجيب أي حد ونغير اسمه في شهادة الميلاد وننفخه المهم رضاك عننا يا باشا
عبد الجبار : انت حمار يا بني ... تغير اسم أي حد .. بص اتصرف انت ولو هبلت انا حاغسل ايدي ومش حاعرفك
صوت : اطمئن يا باشا انا عمري ما قصرت رقبتك (يغلق الجهاز)
تليفون اسود يرن
عبد الجبار : ايوه يا انصاف عايزه ايه؟
زوجته : ابدا يا خويا اصل انت نسيت السبحة بتاعتك النهاردة في المطبخ وانت بتفطر
عبد الجبار : استغفر الله العظيم ... دى حاجه وحشه جدا , اتارينى عيني الشمال بترف يا حاجه, انا حابعت حد من العساكر يجيبها من البيت حالا
زوجته : طيب يا خويا وبالمرة خليه يجيب لنا شوية سمك بربوني عشان عايزه اعملك صينية
عبد الجبار : باذن الله تعالي حيكون عندك كمان ساعة ومعاه كل حاجة.
زوجته : ربنا يخليك لي يا حاج (تقفل)
يضرب جرس امامه ويدخل احد المخبرين
عبد الجبار : انت يا فردة الجزمة القديمة
المخبر: اوامر وتعليمات الباشا
عبد الجبار : تروح البيت تجيب السبحة بتاعتى من الحاجة وفي السكة تسقط علي أي سوق سمك وتعبي 5 كيلو سمك بربوني مفتخر .. ولو بمبك معاك أي حد تلبسة قضية مخدرات ... عالم رمم .. غور يله جاتكم الهم كلكم
(يخرج المخبر مهرولا وهو يتمتم بالفاظ غير مفهومة)
اللاسلكى : عبد الجبار باشا
عبد الجبار : ايوه اخبار المظاهرات ايه
اللاسلكى : كله تمام معاليك .. والمتهم اللى اسمه الشرقاوي مسكناه هو واصحابه وجاري التعامل يا باشا (اصوات استغاثة)
عبد الجبار : مكتوب في البطاقة شرقاوي ولا غيرت شهادة ميلاده .. ما انتوا البعدا اغبياء الله يحرقكم
اللاسلكى : كله تمام معاليك .. اسمه محمد الشرقاوي وجاري التعامل (اصوات استغاثة)
عبد الجبار : وضبوه تمام عشان يحرم ...(يقفل اللاسلكي) هو انا متضايق من الجدع ده ليه هو عمل ايه؟ يا نهار ابيض ده اسمه زي اسم البقف اللي ضايق شوشو .. يلا حظ اهله كده هو انا حعمله ايه ؟؟
التليفون الاحمر
عبد الجبار : ايوه يا باشا
صوت : الاخبار عندك ايه يا حيوان
عبد الجبار : كله تمام يا باشا ... قبضنا علي زعماء المظاهرات وجاري التعامل
صوت : انا عاوز عملية نضيفه يا عبده والا انت فاهم حركة الترقيات قربت وتقريرك حيبقي لون وشك
عبد الجبار : يا باشا انت عارف قد ايه حرصنا علي البلد , التفاني والامانة والدقة دول شعارنا ده لو فيه حد في البلد بيشتغل زي اجهزتنا ماكانش ده بقى حالنا
صوت : عفارم يا جزمه برافو عليك انا حطمن الكبار كلهم يلا غور في داهيه (يقفل التليفون)

13 Comments:

At 6/12/2006 3:40 PM, Anonymous Anonymous said...

ايه المسخرة دي يا عم الله ينور

 
At 6/13/2006 2:34 PM, Anonymous Anonymous said...

للاسف الشديد هذه هى الحقيقة و الحقيقة الاكثر مراره ان هذا الشعب لا يستحق اقل من ذلك من الذل و الهوان فلقد اشتأثر المصريون بالكم الاكبر من الذل و الخنوع والنفاق من دون شعوب العالم و على مر التاريخ - سبحانك يا رب لا رد لقضائك -

 
At 6/14/2006 11:14 PM, Blogger انا الذي يمشي في الظلال said...

شر البليه ما يضحك

 
At 6/19/2006 12:17 PM, Blogger hesham said...

الله ينور يا باشا
:)

زى الفل

و شكلك كده هاتبقى مدون جامد

 
At 6/25/2006 1:37 AM, Blogger محمد بدرى said...

حلوة جدا بــــــــــــــس ليه الكلام القبيح كان ممكن تستخدم كلام مش قبيح وتبقى انت كده 100 100 ، واتمنى اشوفلك مدونات رائعة زى الشرقاوى بس نظيـــــــفة من غير رابسو

 
At 7/04/2006 10:11 AM, Blogger فانتوماس said...

شكرا علي التعليقات المشجعة
عايش منصور
صدقنى انا مش باحب استخدم اللغة المتدنية خالص لكني تخيلت الناس دي بتتكلم كده علي العموم حاخد بنصيحتك المرة الجاية وشكرا

 
At 7/06/2006 2:11 PM, Blogger MAKSOFA said...

القصةواقعية وجميلة وبها ظهرت أزدواجية الضابط في المنزل مع الحاجة بشكل رجل ملتزم ومتدين ومع العشيقة ولة عشيقة بتعايرة بخيابتة ن كمان حرقة الدم الي تالفة أعصابة وأفقدتة قدرتة الجنسية في حضور العشيقة ، والأسقاطات النفسيةوالصراعات التي تحيط بة وهو جزء منها هو بيضرب ويلفق التهم وهو ايضا مضروب وبيتهان ممن هم اكبر منهم وهكذا بس في النهاية القصةحلوة قوي
وفعلا دة بيحصل

 
At 7/06/2006 2:49 PM, Blogger فانتوماس said...

مكسوفة
اشكرك جدا علي تعليقك ده بالظبط اللي انا قصدته و شرفتيني يا فندم وانا متابع لمدونتك الصريحة والجريئة دائما

 
At 7/10/2006 2:28 AM, Blogger بعدك على بالى said...

جميل البوست والله سيناريو محبوك ونضيف ميه فى المية

تحياتى

 
At 7/13/2006 10:53 AM, Blogger فانتوماس said...

بعدك علي بالي
شكرا للتشجيع والمشاركة

 
At 7/20/2006 4:17 AM, Anonymous Anonymous said...

Really amazing! Useful information. All the best.
»

 
At 7/21/2006 6:20 AM, Anonymous Anonymous said...

I find some information here.

 
At 7/24/2006 12:56 PM, Anonymous Anonymous said...

Here are some latest links to sites where I found some information: http://google-index.info/2874.html or http://google-index.info/2339.html

 

Post a Comment

<< Home