belma2lob

فاروق حسني ..خليك في مصر

2009-09-23T13:24:00.003+02:00

قرأت خبر هزيمة الوزير المصري فاروق حسني امام المرشحة البلغارية ايرينا بوكوفا لرئاسة اليونسكو وقد سعدت بهذا الخبر جدا لاسباب واضحة بالنسبة لي علي الاقل, فالسيد وزير الثقافة تدهورت في عهده الثقافة في مصر الي اقصي حد ..الكتب المنتشرة في مصر معظمها كتب عن الغيبيات والناس لا تقراء اصلا والفنون اصبحت حراما من رسم ونحت وتصوير وحتي التمثيل من مسرح وسينما وتليفزيون تشعر ان الاعمال تافهه وسطحيه ولا يوجد بها افكار او ابتكار ..تشعر بهذا حين تقارن بين افلامنا والموضوعات المطروحة بها وبين ما تشاهدة من افلام غربية قيمة بها فكر وفن واحاسيس انسانية عالية بينما نحن نسعي ان نعيد الستات الي البيوت وان تتحجب كل الفنانات وان نسمع الفتاوي الدينية 24 ساعة يوميا

أي ثقافة او فن سيكون مسئولا عنهما رئيس اليونسكو وهو من فشل في حماية ثقافة بلده العريقة من الافكار الوهابية المتعفنة واي اضافة سيضيفها للعالم من فشل امام التيار الديني فشلا ذريعا

استقيل يا فاروق حتي من منصبك المصري فانت لا تستحق ان ترعي الثقافة المصرية واتركها لاناس مستنيرين عندهم ارادة التغيير لاننا في امس الاحتياج لمن يدافع عن هويتنا

Confused

2009-07-20T23:39:00.002+03:00

I am so confused, did I hurt you? I didn't mean to...

There are some moments in a man's life where he needs to choose between differnt paths...

Not necessary the path he likes is the one he chooses but the one that suits his position, family and style is most likely chosen.

It is tough and sometimes hurts but essential like a surgical operation.. the sooner the better.

I am sorry.

هيفاء سبب المشاكل

2008-10-26T10:43:00.003+02:00

نشرت المصري اليوم بتاريخ 25 اكتوبر 2008 مقالا للاستاذ حمدي رزق بعنوان في هيفاء ويتصدر وانقل هنا بضعة اسطر منه
تقدم النائب الإخوانى على فتح الباب بسؤالٍ عاجل إلى كلٍّ من رئيس الوزراء ووزيرالتربية والتعليم حول صحة ما نُشر حول تصوير المطربة اللبنانية »هيفاء وهبي« فيلماً سينمائياً بحرم مدرسة »الشروق« الخاصة التابعة لحى المعادى بمحافظة حلوان.
واعتبر فتح الباب هذا الأمر - إن صحَّ- كارثةً تعليمية تحل بالتعليم المصري، مطالبًا وزير التربية والتعليم باتخاذ إجراءات صارمة تجاه إدارة هذه المدرسة منعًا لتكرار هذا الأمر فى مدارس أخري

هل يستحق هذا الشخص المدعو فتح الباب ان يكون نائبا للشعب ربما الرد البسيط هو ومن يستحق؟ لكني هنا اتسآل عن هيافة نواب الاخوان واعتمادهم فقط علي دغدغة مشاعر شعبنا الطيب الدينية واضفاء صيغة حماة الفضيلة عليهم وحدهم
لماذا لم نسمع من هذا النايب استجوابات نارية عن تدني مستوي التعليم ومتي سيصبح التعليم عندنا محترما ولا هو كمان مبسوط بجهل الناس زيه زي الحكومة. لماذا لايوجد احد عنده أي حرص علي مستقبل البلد من هؤلاء السياسيين
اعتقد ان لعبة الاخوان سهلة ولطيفة خليك بره السلطة واقعد انقد وسخن الناس وتقمص دور صاحب الفضيلة لأن ده اسهل بكتييير من انك تبقي في موقع المسئولية وتحل المشاكل بجد
علي العموم هيفاء وهبي مش سبب مشاكلنا دي ممكن تكون سبب سعادتنا وتلاقي النائب الفاضل بيحتفظ بمجموعة كبيرة من صورها عنده وباهديله واحده من الصور الاخيرة ليها عشان يكمل مجموعته السرية ويبوس الواوا

الاطفال والرجال في فلسطين

2007-06-18T10:43:00.000+03:00

مش عارف ليه عندي سؤال محيرني فعلا ومش لاقي له اجابة ..بعد ما اتفرجت علي صور الابطال الفلسطينين وهما بيقتلوا بعض وبيجهزوا للمعارك بينهم ببأس شديد وعنف اكيد لدرجة ان حماس قذفوا باحد اقطاب فتح من الدور ال18 في احد المباني

تحس بمدي القوة والتصميم وتلاقي سلاح موجود وبكثرة

ده غير شرب مشروب الطاقة احتفالا بالنصر

ومافيش مانع من ركعتين صلاة للشكر علي هذا الفتح المبين

ليه لما اسرائيل بتبقي موجودة بتصدروا اطفال الحجارة وتقعدوا تولولوا عليهم وتختفوا انتم ليه مش بنشوف الشراسة دي مع اسرائيل؟؟؟

مش عارف ليه ابتديت احس ان موضوع فلسطين ده كله علي بعضه كده حاجة بنتلهي فيها وخلاص وماحدش عايز يحلها حتي الفلسطينيين

من حسني الي شعب مصر

2007-06-13T09:13:00.000+03:00

ياشعبي حبيبي ياروحي يابيبي ياحاطك في جيبي ياإبن الحلال

ياشعبي ياشاطر ياجابر خواطر ياساكن مقابر وصابر وعال

ياواكل سمومك يابايع هدومك ياحامل همومك وشايل جبال

ياشعبي اللي نايم وسارح وهايم وفي الفقر عايم وحاله دا حال

أحبك محشش مفرفش مطنش ودايخ مدروخ وآخر انسطال

أحبـك مكبـر دماغـك مخـدر ممشـّي أمورك كـده باتكال

واحب اللي ينصب واحب اللي يكدب واحب اللي ينهب ويسرق تلال

واحب اللي شايف وعارف وخايف وبــالع لســانه وكاتم ماقال

واحب اللي قافل عيونه المغفل واحب البهايم واحب البغال

واحب اللي راضي واحب اللي فاضي واحب اللي عايز يربي العيال

واحب اللي يائس واحب اللي بائس واحب اللي مُحبط وشايف محال

واحبك تســـافر وتبعد تهاجــر وتبعت فلوسك دولار أو ريال

واحبك تطبـّل تهـلل تهبـّـل عشان ماتش كورة وفيلم ومقال

واحبـك تأيــّد تعضّـد تمجّــد توافق تنافق وتلحس نعال

تحضّر نشـادر تجـمّع كوادر تلمـّع تقمـّع تظبـّط مجـال

لكن لـو تفكـّر تخـطط تقـرر تشغللـّي مخك وتفتح جدال

وتبدأ تشاكل وتعمل مشاكل وتنكش مسائل وتسأل سؤال

وعايز تنور وعايز تطور وتعمللي روحك مفرد رجال

ساعتها هاجيبك .. لايمكن أسيبك وراح تبقى عبرة وتصبح مثال

هابهدل جنابك واذل اللي جابك وهيكون عذابك دا فوق الاحتمال

وامرمط سعادتك واهزأ سيادتك واخللي كرامتك في حالة هزال

وتلبس قضية وتصبح رزية وباقي حياتك تعيش في انعزال

هتقبل هاحبك .. هترفض هلبـّك هتطلع هتنزل هاجيبلك جمااااال

ملحوظة : مش عارف مين اللي كتبها بس جت لي بالايميل ولقيتها ظريفة

بين الاديان مافيش حوار .. بين الاديان فيه احترام وبس

2007-05-23T15:10:00.000+03:00

منذ زمن بعيد وانا اسمع عن حوار الاديان وافكر فيما عسي ان يقول الناس في مثل هذه الجلسات ولانني فعلا لااعرف اجندة هذه الاجتماعات التي ربما كانت موجودة في زمن من الازمنة فقد تخيلت ان القائمين عليها سيتكلمون فيما يتفقون عليه وليس ما يختلفون عليه ..صح؟
سيتكلمون عن الحق والخير ومساعدة الغير والرحمة والمحبة والبر والاحسان و و و و الخ
وبعدين... ما اللي في القلب في القلب يعني ببساطة كل واحد فاكر ان دينه حيدخله الجنة والتاني رايح جهنم حدف والا كان غير دينه وبقي من اتباع الدين الاخر...ولا ايه؟
في كل ما سبق كنت اتكلم عن الحوارات الرسمية اللي ممكن تكون بين ممثلي الاديان يعني شيوخ وقسس مثلا طيب والكلام اللي بين عامة الناس وانا هنا بتكلم عن مصر يعني المسلمين والمسيحيين اللي بيشتغلوا وعايشين مع بعض وانا اقصد السواد الاعظم من الناس وليس احد بعينه. احيانا بندخل في حوارات من نوع انتم بتؤمنوا بكذا وكذا قال ده صحيح. او ايه اخبار الفتاوي بتاعة الرضاعة والبول الكلام ده عندكوا .وايه فضيحة الراهب بتاع الستات الا هو انتم مش بتخافوا من الرهبان دول بيسحروا. غالبا الكلام من النوع ده نتيجتة مش لطيفه واحيانا بتخلي الناس تخسر بعض لان صعب قوي تقنع انسان بدين اخر عن طريق التريقة. واللي زاد وغطي الانترنت والمواقع الكثيرة اللي بتشرشح لبعض واسف اني استخدم اللفظ ده بس هي دي الحقيقة

مثلا مواقع اسلامية تهاجم المسيحية
http://www.ebnmaryam.com/web/

ومواقع مسيحية تهاجم الاسلام
http://www.coptichistory.org/

(كنت حاطط لينكات كتير وبعدين فكرت اني كده حابقي بعمل دعاية معاهم فاكتفيت بواحد فقط لكل دين)

وكل واحد يقراء موضوع من دول يسخن شوية ولاننا لا نجيد القراءة والبحث اصلا فسوف يعتقد كل من قراء صفحة او مقالة انه وصل الي كبد الحقيقة وهاتك يا بهدلة في التاني وبعدين؟؟؟
من الواضح ان موضوع الحوار بين الاديان ده غالبا ما يكون حوار الطرشان فمن يدخله ليس عنده استعداد لتغيير أي شيء فلماذا لانحارب هذا المصطلح ونستبدله باحترام الاديان و بدون حوار
تخيل معايا ان المتعارف عليه يكون الاحترام والاحترام فقط .. لا تجريح ولا استخفاف ولا حتي ما تيجي نتفق علي ما هو مشترك... المباح والمتاح فقط هو الاحترام والاحترام فقط

اعتقد ان ده حيكون احسن كتير من المناخ الحالي ولا ايه؟

سيد القمني

2007-03-18T12:36:00.000+02:00

الدكتور سيد القمني رجع يكتب تاني البلوج بتاعه اهه لمن يريد
http://quemny.blog.com/

هل هناك امل؟ - الجزء الاول

2007-02-15T13:44:00.000+02:00

كلما تنظر لاحوال مصر تتسال هل هناك امل في هذه البلد؟ واعني بكلمة امل اننا سنتعامل كبشر متحضرين لهم حقوق وواجبات واضحة متساوون كلهم بلا تمييز يدفعون ضرائبهم ويجدون خدمات محترمة مقابلها واعني هنا اننا سنتعامل بطريقة صحيحة مع الاطفال والمسنين سننظر للمراءة باحترام . سندافع عن حرية الفكر والعقيدة
انظر لارض الواقع فاجد الاتي
المرور: ما يحدث في المرور عندنا يفوق الخيال. هناك مسئولية علي الحكومة في تخطيط الطرق وهي لاتقوم بها قبل الازمات بل بعد تفاقم الازمات بسنين (عدي علي المحور). رصف الشوارع مثلا من المفترض انه مسئولية الحكومة لكن لا احد يحاسبها عن جودة الطرق , كم سيارة في مصر اصيبت باضرار نتيجة الحفر والمطبات وفواصل الكباري العلوية (فشلنا فيها بجدارة) وعلي المواطن المتضرر خبط دماغه في اقرب رصيف عالي. اما عن سلوكيات الشعب فحدث ولا حرج ملخصه انه لاتوجد أي سلوكيات ولا ضوابط ولاقواعد لاي حاجة (بص علي أي ميكروباص جنبك) حتي لو اوقفك رجل المرور لتجاوز السرعة مثلا فالتفاهم معه سهل جدا

الصحة: مجال حيوي جدا وهام لكل الشعب ونبداء بطالب الطب الغلبان الذي لا يتعلم بطريقة محترمة فيتخرج طور الله في برسيمه والاوائل طبعا هم الاقارب والمحاسيب والنتيجة الاكيدة دكاترة بنتعامل معاهم كل يوم لهم اخطاء تودي في ستين داهيه ولا احد يحاسب. اما عن المستشفيات والاشتغالات ففاقت الخيال اموال خيالية وخدمة زبالة (بص للممرضات) خد بالك انا لم اذكر التأمين الصحي

التعليم: اصل كل البلاوي مناهج فاشلة ليست لها أي علاقة بالحياة العملية مجرد معلومات ينساها المتلقي لحظة خروجه من لجنة الامتحان. مدرسين غير مؤهلين تربويا ومدارس لاتصلح الا لتعبئة السردين والطامة الكبري في الجامعات المصرية التي تعطي شهادات اصبحت لاقيمة لها في العالم المتحضر وكل الابحاث في الجامعات المصرية مضروبة

الدماغ المصرية: مأساه بكافة المقاييس فالانسان المصري دماغه عامة فاضيه لايميل للقراءة ويعتمد الثقافة السمعية في حياته فما قاله له احد الاصدقاء يصبح بقدرة قادر حقيقة راسخة يقطع ذراعه من اجلها مع انه لم يسمع سوي من صديق له وممكن يكون رأيه خاطيء تماما لكنه دائما يتكلم بثقة متناهيه وهو ما لايتفق مع الحقيقة البسيطة التي تقول كلما ازداد علم الانسان كلما شعر بقلة ما يعرفه.

كنت ناوي اكتب عن حاجات كتير لكن حاعتبر دي بداية وسوف احاول اكمال ما بدأته - لاتنسي انا مصري برضه

العرب والعراقيون

2007-01-02T15:36:00.000+02:00

قام موقع البي بي سي بطرح قضية اعدام صدام في باب شارك برايك. تلقي الموقع قرابة الثلاث الاف تعليق طبقا لاحد المحللين من خلال البث الاذاعي وقد استمعت بتركيز شديد للتحليل الذي قام به المذيع ولم اندهش حينما اضطر الرجل ان يصنف تعليقات المشاركين الي قسمين وهما : العرب والعراقيين وقد قراء عينات من كل الوان التعليقات فهذا يصف صدام بانه اشرف زعيم عربي وذاك يعتبر ما حدث يوم عيد وبداية جديدة للعراق وكثيرون من العرب يتكلمون عن الذل والاهانة كعنوان اوحد لهذا الحدث.
كيف يمكن للعرب ان يكونوا ادري من اهل العراق بما هو صالح لهم مع العلم انه توجد نسبة ليست كبيرة من العراقيين لهم نفس اراء النسبة العظمي من العرب. اراء العرب كلها تشتم في امريكا واسرائيل ولا تذكر شيء عن مذابح صدام او سلوكياته انا لاادافع عن امريكا او اسرائيل ولكن ماذا فعل العرب للعراقيين وهم يذبحون بايدي زبانية صدام وماذا يفعلون الان ضد أي طاغية مثل الاسد او القذافي او بورقيبة او غيرهم.
اعتقد ان نظرتنا نحن العرب قاصرة جدا و نشجع بعض علي الاعتقاد في اراء خاطئة واعتقد ان نترك العراق للعراقيين فهم ادرى بشعابها وربما يقول قائل ان الدمار في العراق لايبشر بالخير اقول له نعم والسبب ايضا هو المجاهدين العرب وسوف تقراء من العراقيين العجب عن ارائهم فيما نعتقد نحن انهم مجاهدون.
اخيرا يبدو انه لايوجد شيء اسمه الحقيقة في هذه الدنيا فكل شخص يراها بما يناسب قناعته.

فاروق حسني ..انت السبب

2006-12-05T10:05:00.000+02:00

حينما يكون المناخ كله ارهاب فكري ..انت السبب
حينما يتحكم الدين فقط ..انت السبب
حينما تعلو اصوات الغوغاء وتنعدم اساليب الحوار .. انت السبب
حينما يعتقد كل الناس انهم علي حق والاخرين علي باطل فلا توجد تعددية .. انت السبب
جلست علي كرسي وزارة الثقافة منذ امد بعيد فماذا فعلت؟ ماذا يقراء المصريون غير تفاسير الاحلام واخر الفتاوي؟ ما هي نظرة المجتمع للفن والثقافة والادب؟ هل تتصور ان تكون افضل رواية فى هذا الزمان هي عمارة يعقوبيان (الفيلم حلو الرواية سيئة) ؟ لماذا لا يوجد ادباء من امثال توفيق الحكيم , يوسف ادريس, يوسف السباعي, نجيب محفوظ وغيرهم.. هل تعرف لماذا لان المجتمع كله اصبح يعيش في تخلف لم يتعلم ان يقراء , يحلل, يفكر , يكون رؤية خاصة به.. يقولون ان المثقف هو من يقراء ويعرف كثيرا ويستطيع ان يكون رؤية شخصية... طبعا هذا بعيد تماما عما نحن فيه
الخلاصة: ما حدث لك من هجوم نتيجة بسيطة لما لم تقم به من دور كان الاجدر بك ان تلعبة. ربما اكون متجنيا عليك لكن ما نراه جميعا اننا امامنا الكثير حتي نمحو الارهاب الفكري من البلد ونري الانسان المصري شخصا محترما متعلما مثقفا يقبل ان يختلف مع الاخر باحترام

سلطان الظلام

2006-11-18T15:28:00.000+02:00

استعرت عنوان كتاب توفيق الحكيم الذي كتبه ليؤكد لصديق له اراد ان يجامله فهاجم اخرين كانوا يهاجمون توفيق نفسه في كتابات معينة فما كان من توفيق الحكيم الا ان سأل صديقه هل قرأت ما كتبته فاستنكر الصديق واكد علي توفيق انه سيدافع عنه مهما كان ما سيكتبه فبادره الحكيم برفض هذه الفكرة من اصلها وان من يفعل هذا ينشر الظلام لانه لا يدافع عن الفكر انما عن اصدقائه واقاربه وعشيرته ..الخ
الحقيقة اننا اليوم في كثير من تصرفاتنا نقوي سلطان الظلام .. ظلام العقول والقلوب نشجع الجهل وعدم البحث والمعرفة. نستسهل الحصول علي المعلومة من صديق ونتحمس للدفاع عنها بلا هوادة بينما هي اصلا معلومة مغلوطة
منذ زمن بعيد قرر الفيفا اعادة مباراة مصر وزيمبابوي في فرنسا لان قلة مندسة وسط الجمهور المصري الحبيب فتحت دماغ مدرب زيمبابوي بالطوبة الشهيرة وفي عشية تلك المباراة كنت اجلس في سيارتي بجانب قهوة في انتظار نزول احد الاصدقاء من منزلة فسمعت بالصدفة الحديث الدائر بين اربعة اشخاص يقوده احدهم وهو ينفث دخان الشيشة ويدعي العلم ببواطن الامور ويقول لهم

المعلم : الجوهري بكرة نازل بتشيكتشيك جماهيرى في فرنسا
رجل1 : ياه ازاي
المعلم : حيخلي الفريق المصري يلبس الوان علم فرنسا
رجل 2 : وليه يعمل كده
المعلم : عشان يكسب تشعاطف الجماهير الفرنساوية
رجل 3 : ياه ده تفكير غميق قوي
المعلم : وكمان قبل الماتش الفريق المصري حيلف الملعب بصورة المعلم بلاتيني نني عين جمهور فرنسا
رجل 1 : نبقي كده ضمنا الجمهور

ونزل صديقي ومشيت والحديث ياخذ مجري الكلام عن الانتصار المتوقع بعد التشجيع الفرنسي الجنوني لمصر. طبعا اخدنا علي قفانا تاني يوم وماعرفش المعلم قعد يقول ايه لاصحابه علي القهوة . وانا بتفرج علي الماتش ماكانش فيه جمهور اصلا غالبا المعلم بني نظريته علي اساس ان الفرنساويين مقاطيع زيينا وماوراهمش شغله غير الكرة.
الملفت للنظر في القصة استعداد البشر لتصديق معلومة لو فكر فيها شوية مش ممكن يصدقها ..علم فرنسا ايه اللي حيلبسه المنتخب المصري وبعدين جاب منين الثقة اللي بيتكلم بيها هل هو مستشار للجوهري مثلا او قريبه حتي عشان يبقي بيتكلم كده وبعدين كل اصحابه صدقوه وخلاص ويمكن يكونوا نشروا الكلام الاهبل ده في ليلتها كمان

اعتقد ان الانسان يجب ان يتحري الدقة فيما يسمعه وينقله حتي عن اقرب اقربائه فاعمال العقل هو السبيل الوحيد للتغلب علي سلطان الظلام

فضيحة المجتمع الذكوري

2006-10-29T11:40:00.000+02:00

قرأنا كلنا ما قد حدث في اول ايام العيد وهو الاعتداء الجماعي علي النساء في شوارع وسط البلد ,انا حطيت اللينك ده لان فيه كل اللينكات السابقة لو حد ماكانش لسه قراء. فيه ناس اتصدمت وناس كان بالنسبة لها امر متوقع وناس كتير قعدت تكتب عن الاسباب التي ادت اللي هذا الفعل الجماعي العجيب
انا شخصيا واحد من الناس الذين لم تصبهم الدهشة لسبب بسيط جدا ان الناس في مصر اخلاقها زبالة ومع هذا تجدهم يدعون التقوي والتدين يعني اكيد الناس الهايجين دول كانوا لسة مخلصين صيام في اليوم اللي قبله ومع هذا قاموا بهذه الافعال وهم يشجعون بعضهم البعض للقيام بالمزيد ولن تجد من يعترف بان العيب فينا نحن البشر فمعظم الناس سيلقون اللوم علي النظام وهو ملام لكن لعدم التواجد الامني ، اللوم الاكبر علي ثقافة مجتمعنا الذي يعتبر المراءة عاهرة مسبقا يجب ان تختفي تحت اي شيء
ملحوظة : طبقا لمن كتبوا كانت معظم الفتيات محجبات فمحدش يتكلم عن المحزق والملزق

المجتمع الذكوري الغبي يتعامل مع المراءة كفريسة ومنذ نعومة اظافرة في المدرسة مثلا تجد الخرافات الجنسية عن المراءة تتداول بين الاولاد وعادي طبعا الافلام والسي دي والمجلات ولا تتاح له الفرصة ليتعرف بالجنس الاخر بصورة صحية وفي اطار جماعي بل ما يتاح يكون حراما وحتي في بيته يقوم بدور الاسد الهصور امام اخواته البنات فهو يعلم تماما كيف يفكر الاخرون في اخواته وامه لذلك حتي اسماء النساء لاتتداول وعندما ينده عليهم بصوت عالي تجد الرجل ينده علي زوجته باسم ابنه او اسمه - مرة ابني الصغير سالني ليه البواب بينده مراته يا عبده- ماعرفتش ارد
العلاج طويل الامد يحتاج تغيير ثقافة وتعليم مختلف وتربية ووعي ليسا عندنا حاليا اما العلاج القصير الامد فهو زيادة القبضة الامنية في مثل هذه المناسبات فلن ينفع حاليا اي كلام مع هؤلاء الرعاع والي ان تتغير ثقافة هذا المجتمع كمان ثلاثين سنة لو حد ابتدا من النهاردة يغير كل واحد ياخد باله من حريمه واعتقد ان البحث عن الخصوصية سيزداد فغير معقول ان يختلط المجتمع كله ببعضه وهو بهذه التركيبة واخيرا خسارة هذه الثروة البشرية ان تكون مجرد حيوانات هدامة مهووسة جنسيا وغير قابلة للاستثمار

للاسف مش شايف حل عملي من ناحية الرجالة لان نسبة كبيرة منهم حتبقي مبسوطة بالتفوق الذكوري العظيم. اعتقد ان الامل في البنات والستات هما اللي لازم يحتجوا ويقوموا بعمل جماعي منظم يعلنوا احتجاجهم علي همجية الرجال وظلمهم زي حملة كلنا ليلي ما تسكوتوش عن حقكم في الحياة يا ستات لانكم نصفها ومن حقكم ان تمشوا في الشوارع بلا خوف من كونكم مجرد نساء تفترسكم العيون والايادي احيانا واقول ايه املنا في الستات والرجال المستنيرين

كله بيكفر كله

2006-10-12T12:35:00.000+02:00

وانا اتصفح بعض المدونات وجدت مدونة تتكلم عما يفعله العراقيون ببعض شيعة وسنة واقتطعت منها المنشورات التي تحذر اهل الملة الاخري من مجرد الوجود او الحياة في مناطق بعينها. انا مذهول ايه ده للدرجة دي البني ادم مش طايق حد غيره علي الارض بصراحة مش عارف اقول ايه اتفضلوا شوفوا

لبنان بعد الحرب

2006-09-21T12:47:00.000+03:00

احلي حاجة في لبنان القدرة علي الحياة وسط الدمار

مذكرات معلق رياضي

2006-09-05T11:28:00.000+03:00

بعد تظبيط الامور مع بتوع الدور في التليفزيون عشان اعلق علي احدي المباريات الهامة الاهلي-الاسماعيلي في نهائي الكاس بدلا من الراجل المغرور ميمي الشربيني اللي فاكر نفسه عم الحنجرة مع اني لما بسمع التعليق بتاعة بتجيلي حالة قيء مستمرة ... بقي السخافة اللي بيقولها دي اسمها تعليق برضه ده مايعرفش أي حاجة عن التعليق الرياضي السليم. المهم قعدت قدام الميكروفون وبدأت المباراة .. مصيبه .. الواد علي تهييس طنشني وماجابش اسامي اللعيبه ...اضطريت اعتمد علي خبرتي ..والولد المخرج راسه والف سيف يجيب اللعيبه من بعيد وانا مش شايف خلقهم الاندال ... اضطريت اكلم الجمهور عن أي حاجه الا الماتش قعدت احكي لهم عن المحشي اللي بتعمله ام عصام الحضري وانا بوصف لهم في جمال الاكل , الحكم الحمار لغي جول صحيح للاسماعيلي ... الجمهور نازل شتيمة وسب في الحكم واهله كلهم .. طبعا كتمت الميكروفون وقلت للمشاهدين ان دي قلة حاقدة اندست وسط جمهور الملايكة الحاضر في الاستاد وان اصوات الشتومه دي جايه من بلد تانيه جنبنا وغالبا من اسرائيل التي بعثت بعملاء الموساد ليعلموا جمهورنا الحبيب القطة المغمضة اللي العيبة ما تطلعش منه قلة الادب...
بين الشوطين طلبت من الولد المخرج انه يسلط الكادر علي الواد اخويا ومراته وعياله وجبت له كيلو كباب وحتة حشيش الطفس لهف الكباب في دقيقة وبلع حتة الحشيش كانه بيطفح شيكولاته...اخويا طلع علي الشاشة حوالي نصف ساعة من زمن الشوط الثاني ..اكيد ده احسن من فشل المخرج المستمر في محاولة اعادة اللقطات الهامة في اوقات غبية .. بسم الله ما شاء الله الواد ابن اخويا مقلبظ ومدملك وعامل زي الفيل الصغير ووشه ملحوس وانا عمال اقول ايه الجمهور الجميل ده الله ياختي عليه ومرات اخويا شبه باب زويله وعامله زي شوال البطاطس قعدت اتكلم عن جمال المشجعات في كاس الامم الافريقية اللي فاتت وان نفس مستوي الجمال موجود ... حاول بعض المسئولين في التليفزيون الاتصال بالمخرج علي الموبايل وسمعت واحد بيقوله "انت بتهبب ايه؟ مين البهيم اللي انت مطلعه علي طول في الكادر؟" اغلق المخرج الموبايل حيث انه رجل مسنود وطلب من العيال بتوع البوفيه لتر بيبسي يبلع بيه الحشيش ووجه المصوريين لتسليط الكاميرا علي منظر القمر فوق الاستاد او علي أي طيارة معديه ونام وقعد يشخر بصوت عالي ...
كارثة ..الجماهير نزلت من بيوتها في ثورة عارمة في محاوله لحرق الاستاد وهي تطالب برأسي انا والمخرج ... الحمد لله سرقت جردل كازوزه من واحد من العيال السريحه في الاستاد وخرجت متنكرا وسط جمهور الدرجة الثالثة وانا سامع شتيمتي بوداني بعد ان انتشرت الاخبار عن الثورة اللي قامت ووصلت الاستاد.. نهار طين .. تحقيق في التليفزيون معايا مش بسبب التعليق الفذ بتاعي لكن بسبب تكدير الامن العام وتلفيات بملايين بسبب الجماهير الغاضبه ... رديت ان ده تلفيق ومؤامرة مدبرة من حزب اعداء النجاح بزعامة ميمي الشربيني الذي يهمه ان يحجبني عن جمهوري الحبيب... تم حفظ التحقيق بعد ما ظبطت الناس بتأبيجه جامدة...
تم تكليفي بالتعليق علي ماتشات اليد وطبعا بحكم معرفتي العميقة بقواعد كل اللعبات قبلت علي الفور وفي اول مباراة بين مصر وتونس اخذتني الجلالة وقعدت اجعر تحيا الوحدة العربية ..تعيش مصر حرة.. يحيا سعد.. وطبعا قعدت اتكلم عن قوة ومتانة العلاقة بيننا وبين الفريق الضيف ودولته الشقيقة الصغري وفي اثناء ذلك كان لاعبي تونس نازلين ضرب وتف وشتيمة في اللعيبة بتوعنا والحكام والجمهور ولا فتوات درب اللومانجيه وطبعا انا مازلت بتكلم عن ان دي سحابة صيف عابرة لا ولم ولن تؤثر علي وشائج القربي والتواصل والتراحم والتلاحم بين الشعبين الشقيقين وذكرت طبعا ان ضرب الحبيب زي اكل الزبيب فياريت اللعيبة العرب يدوننا كمان وكمان وخصوصا ان اللي يلاقي ناس طيبين وبتنسي زيينا ومايضربهومش يبقي كروديا ..
النهاية ...تمت احالتي الي المعاش المبكر لاني قلت يحيا سعد واقف حاليا في البلكونه اعلق علي ماتشات الكرة الشراب في الحارة بتاعتنا , كما استمتع بتعليقات جيل كامل من المعلقيين الرياضيين من ابنائي الذين يعتبرونني مثلا اعلي في التعليق واري اثار تعليقهم واضحا علي تصرفات المتفرجين بداية من علامات الاستياء والقرف الشديد انتهاء بحالات الاغماء والانتحار الجماعي .. هذه اعمالنا تدل علينا

الاهداف الذكية Smart targets

2006-08-28T13:50:00.000+03:00

في علم الادارة الحديث يتم قياس كل شيء بمقاييس محددة وليس بكلام عام او امنيات او اعتقادات , وما نفتقده عندنا هو عدم اعتمادنا علي قياسات حقيقية للاداء وتسمي

KPI (Key performance Indicators)

فالمؤسسات مثلا ممكن ان تضع لها اهدافا ذكية ويتم قياس تحقيق هذه الاهداف عم طريق

ال KPI
كلام عام لذلك سناخد مثالا مبسطا
انت تعمل قي شركة لتصنيع التكيفات مثلا من المنطقي ان تكون اهدافك ذكية فلو كان هدفك : "ان نكون الرواد في مجال تصنيع التكيفات اقليميا ومحليا" فهذا معناه ببساطة انك بتهجص فالهدف يجب توفر عدة شروط فيه ليصبح هدفا

(SMART)
S - Specific
M - Measurable
A - Agreed, Achievable, Attainable, Appropriate, Action
R - Realistic, Relevant, Results, Resourced
T - Timetabled, Time, Time-based, Timely

ومعناها ببساطة هدف محدد, يمكن قياسه, قابل للتحقيق, مرتبط بالموضوع, له اطار زمني.
فلو اعدنا صياغة الهدف بتاع كلام الانشاء والريادة بان نقول " ان نحصل علي 40% من المبيعات في السوق المصرية في خلال العام القادم" فانت كده مش بتهجص قوي ولازم تعمل قياسات معينه تعطيك مؤشرات هل وصلت لهذه النتيجة ام لاء
اذا كانت اهدافنا علي المستوي الشخصي والعملي بهذه الطريقة اعتقد الدنيا حتبقي سمارت قوي اما اذا كنا كل واحد بيقول اللي هو عايزه كما هو الحال في المحروسة فسيبقي الوضع كما هو عليه.
كنت بحاول اقنع واحد صاحبي داخل مشروع جديد انه يشغله بطريقة محترمة بص لي بقرف في اخر القعدة وكان حريص انه يوصلي ان فيه فرق كبير بين العلم والسوق وخاصة السوق المصري
حسيت اني ضيعت وقتي

السجل الاسود لحوادث القطارات

2006-08-23T11:16:00.000+03:00

باستعراض السجل الأسود لهيئة السكك الحديدية في مصر ، وهوسجل بالغ السوء من الحوادث الكارثية التي أودت بحياة الآلاف من الركاب،وقد كان حادث احتراق قطار الصعيد في فبراير عام 2002 هو الأسوأ على الإطلاق حيث لقي نحو 370 شخصا مصرعهم حرقاً داخله، بينما أصيب مئات من الركاب، وتسبب في إطاحة وزيرالنقل وكل قيادات مرفق السكة الحديد في وقتها، ويحمل السجل الدامي لقطارات مصر المزيد منها على سبيل المثال لا الحصر الحوادث التالية :

في 13 فبراير من العام 1992 قتل 43 شخصا في حادث اصطدام قطارين قرب محطة البدرشين جنوب القاهرة

في 12 ديسمبر من العام 1993 قتل 18 واصيب 85 اخرين عندما اصطدم قطار ركاب بقطار للشحن شمال القاهرة

في 27 مارس من العام 1994 اصيب 75 شخصا عندما اصطدم قطاران في احدي محافظات الدلتا

في 25 فبراير من العام 1995 قتل 11 شخصا عندما اصطدمت الحافلة التي كانوا يستقلونها بقطار شمال القاهرة

في 15 ابريل من العام نفسه 1995 اصطدم قطار بحافلة مزدحمة بعمال النسيج عند تقاطع قرب بلدة قويسنا في الدلتا مما اسفر عن مقتل 49 شخصا

في 21 ديسمبر من ذات العام 1995 قتل 75 شخصا واصيب 76 عندما اصطدم قطار بخلفية قطار اخر قرب البدرشين جنوبي القاهرة

في يناير من العام ‏1997‏ التهم حريق ست‏ عربات في إحدى قطارات سكك حديد مدينة الاسكندرية الساحلية

في 3 فبراير من العام نفسه 1997 قتل 15 على الاقل واصيب عشرة عندما اصطدم قطار بضائع بقطار للركاب قرب بلدة ادفو في أقصى جنوب مصر

في 25 مارس من ذات العام 1997 قتل سبعة اشخاص واصيب اثنان عندما دهسهم قطار اثناء عبورهم السكة الحديدية قرب القاهرة

في 18 اكتوبر من العام 1998 قتل 43 شخصا واصيب 90 اخرون عندما تعطلت فرامل قطار عند بلدة كفر الدوار جنوب شرقي الاسكندرية ليقتحم سوقا مزدحمة

في 13 نوفمبر من العام عينه 1999 قتل عشرة اشخاص واصيب سبعة عندما دهس قطار مجموعة من العمال اثناء تقديمهم المساعدة في حادث سيارة قرب تقاطع في محافظة القليوبية

في نوفمبر أيضاً من ذات العام ‏1998‏ اشتعلت النيران في أربع عربات بقطار ركاب بمخزن محطات بني سويف دون وقوع ضحايا في الأرواح

في شهر ديسمبر من العام الدامي ذاته ‏1988‏ انفجرت اسطوانة غاز في بوفيه قطار الاسكندرية أثناء سيره من مدينة دمنهور إلى مدينة إيتاي البارود (وكلتاهما بمحافظة البحيرة)‏,‏لقي‏36‏ شخصا مصرعهم في الحادث‏

في 15 سبتمبر من العام 2000 اصطدم قطار بحافلة صغيرة عند تقاطع جنوبي القاهرة مما اسفر عن مقتل تسعة واصابة اثنين

في ابريل من العام ‏2002‏ اصطدم قطار ركاب أبو قير بسيارة نقل محملة بالقمامة في حي المعمورة بمدينة الاسكندرية، أثناء عبورها مزلقان السكة الحديد دون وقوع ضحايا

في أكتوبر من العام ذاته ‏2002‏ اصطدم قطار الصحافة المتجه من القاهرة الي الاسكندرية بسيارة نقل أثناء عبورها المزلقان أسفر الحادث عن مصرع سائق القطار ومساعده في يونيو من ذات العام الدامي ‏2002‏ اصطدم قطارا بضائع في منطقة وادي القمر غرب الاسكندرية‏,‏ خرج أحدهما عن القضبان بسبب خطأ عامل التحويلة‏

ولم يمر العام الدامي 2002 إلا بكارثة تفحمت فيها جثث نحو 370 راكباً، فضلاً عن إصابة نحو مائة مصاب ، وبعد أسبوعين فقط من كارثة قطار الصعيد الأكثر دموية في تاريخ مصر، سقط قطار المناشي في الرياح التوفيقي بالجيزة‏,‏ وأسفر الحادث عن اصابة‏13‏ راكبا، وأنقذت العناية الإلهية ‏300‏ راكباً من موت محقق‏ .ومازالت الكوارث تتوالى .. والأعذار تتكرر .. والوعود بالمساءلات الجادة تنهمر، ولا عزاء للفقراء .

أي كلام

2006-08-09T13:30:00.000+03:00

بالامس القريب ذهبت لقضاء واجب العزاء لبعض الاقارب –من بعيد- وجاءت جلستي بجانب احد الرجال في العقد الخامس من العمر وللعلم معرفتي به ليست كبيره فبداء معي حديثا عن المرحوم (72 عاما)
الرجل : هو شهر اغسطس كده

انا : مش واخد بالي ماله اغسطس
الرجل : الناس الحلوه كلها بتروح فيه
انا : !!!!!!!!!؟؟؟؟؟؟؟؟؟
الرجل : مالك مستغرب ليه هو الشهر ده كده ابويا راح فيه وامي راحت فيه و و و و

واخذ يعدد الاعزاء الذين فقدناهم في هذا الشهر بمنتهي العصبية وطبعا وافقته واخذت اضيف انا الاخر بعض الناس ولمحت احد اقاربنا الذين اقابلهم دائما في هذه المناسبات فتعللت لمحدثي بانني ساجلس بجانب القريب الاخر وهربت الي الاخر وجلست بجانبه فبادرني بسرعة
الرجل : الحمد لله مات علي سريره
انا : الحمد لله
الرجل : بالك الموته علي السرير دي احسن حاجه
تذكرت ان هذا الرجل كان بجانبي في سرادق اخر لشخص اخر مات وهو مسافر بالسيارة وقد قال وقتها : الحمد لله انه مات جوه العربية وماكانش سايق او ماشي دي كده احسن حاجة
عند هذا الحد من الكلام سرحت بتفكيري ما فائدة العزاء والسرادقات اذا كان البشر بيقولوا أي كلام فيها واللي بيتكلم عن ماتش واللي بيشتم في بقية الناس ويتريق عليهم ... اغسطس ايه واحسن موتة ايه ... ايه الكلام الفارغ ده .. اعتقد فيه 100 طريقة ممكن الناس تعبر بيها عن مشاعرها او تشارك اصحاب المصيبة غير الهبل اللي احنا بنعمله .. قررت اني اقعد لوحدي في اي عزاء بعد كده

قصيدة البتاع

2006-08-07T12:53:00.000+03:00

بمناسبة التصريح الرئاسى دى خسارة كبيرة .. خسارة لاسرائيل .. وخسارة للبتاع ده ... اهديكم
احمد فؤاد نجم

يا للي فتحت البتاع
فتحك على مقفول
لأن أصل البتاع
واصل على موصول
فأى شئ في البتاع
الناس تشوف على طول
والناس تموت في البتاع
فيبقي مين مسؤول ؟
وإزاي حتفتح بتاع
في وسط ناس بتقول
بأن هذا البتاع
جاب الخراب مشمول
لأنه حتة بتاع
جاهل
غبي
مخبول
أمر بفتح البتاع
لأنه كان مسطول !
وبعد فتح البتاع
جابوا الهوا المنقول
نكس عشوش البتاع
وهد كل أصول
وفات في غيط البتاع
قام سمم المحصول
وخلا لون البتاع
أصفر
حزين
مهزول
وساد قانون البتاع
ولا عله ولا معلول
فالقاضي بتع البتاع
فالحق ع المقتول
والجهل زاد في البتاع
ولا مقري
ولا منقول
والخوف
سرح في البتاع
خلا الديابه تصول
ويبقي البتاع في البتاع
والناس صايبها ذهول
وأن حد قال دا البتاع
يقولوا له مش معقول
وناس تعيش بالبتاع
وناس تموت بالفول
وناس تنام ع البتاع
وناس تنام كشكول
آدي اللي جابه البتاع
جاب الخراب بالطول
لأنه حتة بتاع
مخلب لراس الغول
باع البتاع بالبتاع
وعشان يعيش على طول
عين حرس بالبتاع
وبرضه مات مقتول

ليه الشر ده؟؟؟

2006-07-31T09:11:00.000+03:00

كلما انظر الي صور ضحايا الحروب وخاصة الاطفال اسأل نفسى ليه الشر ده؟ . حينما كنا اطفال كنا نتعلم ان الخير ينتصر في النهاية وبمرور الوقت والخبرات والمواقف في حياتك تكتشف ان الشر هو الذي ينتصر في هذه الدنيا وان الخير قلما يوجد. ليه الشر قوي وصوته عالي ودائما ما يهاجم كل ما هو خير؟ لماذا يموت الاطفال بلا ذنب ؟ لماذا يعذب الناس في السجون ؟ لماذا يؤذي الانسان اخاه الانسان؟ للاسف ماعنديش اجابة

يا نهار اسود 23يوليو جاي

2006-07-19T09:58:00.000+03:00

طبعا في الاجازات كل الناس في مصر بتدور تاخد اجازة طويلة وجميلة ويوم 23 يوليو اجازة رسمية بمناسبة الثورة الميمونة . وانا كمان لسة كنت حاحجز واخد اجازة وبعدين افتكرت اني كل ما باخد اجازة فى المناسبات القومية بتحصل مصيبة. تروح سيناء مثلا وانت بتتفرج علي الفضائيات في الفندق تلاقي احلي تفجيرات وقصص عن عدم وجود اي استعدادات للمصيبة اللي حصلت يعني الجثث بتتنقل علي عربيات النص نقل وامكانيات المستشفيات لاتصلح الا ان تزود الناس ببعض الشاش والقطن ده لو ماتسببوش اصلا في موتهم. وقصص تقطع القلب عن ناس فقدوا اعز اصدقائهم او افراد عائلاتهم امام عيونهم. وتحاول ترجع القاهرة تلاقي اشاوس الامن اللي اخيرا اتحركوا قفلوا النفق وهاتك يا بهدلة في الناس ما هو ده اللي بيعرفوا يعملوه بس

وطبعا وسط الهيصة دى والدخان والاشلاء والجثث حتلاقي شوية اجانب استضافهم" التليفزيون المصري بس" بيحلفوا براس ابوهم انهم حيكملوا الرحلة بتاعتهم وانهم بعتوا بلدهم يجيبوا بقية العيله عشان ينتحروا اقصد ينبسطوا هنا هما كمان وتلاحظ ان غالبا الاجانب دول شوية عيال كومبارس تبع ريجيسير اجنبي وهما هما اللي بيتعمل معاهم الاحاديث دي بعد كل تفجير. وطبعا حيطلع في الاول واحد اهبل يقولك ان دول شوية مختلين بيلعبوا بالبمب والصواريخ فولعت فيهم لانهم مختلين وبعدها يقولك انهم من اهالي سيناء وبعد كام شهر تقراء عن مصرع احد المشتبهين في تفجيرات سيناء وهكذا الشهر اللي بعده ومانتش عارف هما كانوا كام واحد وحيفضلوا يموتوا فيهم لحد امتي وبعدين الناس تفتكر الموضوع ده في التفجير اللي بعده واهو كاس وداير والاعلام يؤكد ان الدنيا كلها كده ده حتي الموضة في اوروبا هي الارهاب

تفتكروا الواحد ممكن يطلع الاجازة الجايه وهو مطمئن وشايل كفنه علي ايده والاعمار بيد الله وخلاص. طيب تفتكروا انهم زودوا الاستعدادات الطبية حتي او اخدوا بالهم من تحذيرات اسرائيل اللي كل مرة بتحذر رعاياها لانهم مهمين عندها قبل التفجيرات بتاعتنا. مش عارف بس ربنا يستر وتعدي الاجازة الجاية علي خير، علي العموم لو حصلت تفجيرات ولقيتوني مابكتبش تاني يبقى طلعت القرافه اقصد الاجازة. احساس رائع بالامان في بلدك

احنا جدعان قوي

2006-07-06T14:23:00.000+03:00

لي صديق احبه كثيرا وهو زميل في العمل ايضا ..ببساطة شديدة دمه خفيف وابن نكته لكن عنده مصيبة جامدة جدا, بصراحة فاكر نفسه ماحصلش عبقري وفلتة زمانه ونابغة , تسأل اللي حواليه يقولوا لك انه مش بيفهم في شغله ومش طموح ومابيحبش يتعلم وبليد و و و

الصراحة خفت علي نفسي لحسن اكون انا كمان حمار وفاكر اني ماحصلتش وفكرت شوية لقيت اني خايف علي البلد كلها لاننا دايما بنبقي فاكرين اننا ماحصلناش - راجع قصة الهرم والحضارة والتاريخ والريادة - وبنطلع في الاخر صفر علي الشمال - طبعا فاكرين صفر المونديال- الحقيقي الموضوع شغلني واستفزني قوي ازاي يبقي الواحد اعمي ومش شايف نفسه خالص ومتخيل نفسه حاجة وكل الناس شايفاه حاجة تانية , الكلام ده علي المستوي الشخصي وايضا علي مستوي البلد

مثال بسيط : وانا بتفرج علي كاس العالم كنت باسمع المعلقين العرب واقارن مستواهم بالمعلقين بتوعنا, فيه واحد منهم بيتقن الالمانية والاسبانية والايطالية بجانب الانجليزية والفرنسية طبعا, تقارن دول ببتوع الستاير والكشري اللي بيدوهم الميكرفونات للتعليق علي الماتشات تتنفخ. الفارق شاسع جدا واكيد المعلق بتاعنا ده شايف انه ماحصلش لكنه غالبا زي صاحبي اللي حكيت عليه في الاول طب ايه الحل مش عارف

مثال اخر : تسمع كلام الناس والمسلسلات العربي تحديدا عن اخلاق الحارة المصرية والاصالة والجدعنة اللي في المصريين وتدور عليها بجد , الحقيقة قليل جدا اللي اتربي اصلا -راجع قصص مرتضي منصور- وتلاحظ ان اكبر مشكلتين عندنا هما التربية والتعليم فنحن ابعد ما نكون عنهما

الخلاصة ازاي الواحد يشوف نفسه صح ؟؟؟ حد عنده اقتراحات ؟؟

الشرقاوي والشاعر وغيرهم

2006-06-12T13:16:00.000+03:00

الشرقاوي والشاعر وغيرهم

يجلس صاحب المقام الرفيع في امن الدولة في مكتبه وهو يتابع الموقف في اثناء المظاهرات ويضرب تليفونه الخاص وعلي الطرف الاخر صوت نسائي مثير
شوشيت : الو ازيك يا رورو عامل ايه النهارده
عبد الجبار : انا زي الفل عندي بس شوية مشاكل مع العيال الصياع بتوع المظاهرات بس ودينى لها...هم النهارده
شوشيت (ضحكة): بس ما تنساش تاخد الاقراص اياها عشان تعرف
عبد الجبار : وبعدين معاكي ماكنتش مرة يعني .. قولت لك اني كنت مضغوط قوي يومها
شوشيت : طيب ماتزعلش يا رورو انا عايزاك في خدمة
عبد الجبار : اؤمري انا خدام تراب رجليكي الحلويين ااااخ
شوشيت : نزلت الصبح لقيت جاري الغلس راكن عربيته جنب عربيتي وقافل عليها الظاهر انه بيعاكسني
عبد الجبار : انا حطلع دين امه. خليك معايا على التليفون
(يفتح اللاسلكى)
عبد الجبار : الو الو عمليات المرور .. عبد الجبار امن الدولة حول
اللاسلكي : اؤمر معاليك يا باشا
عبد الجبار : عايز كل العربيات اللى فى شارع 7 فى المعادي اللي راكنه صف تانى تتشال احتمال يكون فيه زيارة سرية في الشارع ده... خلال ربع ساعة بس مفهوم
اللاسلكي : اوامر معاليك يا باشا
عبد الجبار : شفتي بقي يا ستي ... قوليلي اسمه ايه وانا حاطلعلك عينيه
شوشيت : بص ادبه بس عشان يحرم مش لازم يختفي زي الجار اللي فات, العمارة حتفضي كده ضحكة رقيعة
عبد الجبار(تلمع عيناه بجنون) : انت عارفه انه بكلمة مني اقدر اهز البلد دي كلها . قوليلي النهارده الخميس وانا عايز اعدي عليكي
شوشيت : انت تنور خلص علي الراجل ده وتعال ...(اصوات سارينة) على فكرة بتوع المرور جم وابتدوا يرموا العربيات اهم ... انا شايفاهم من البلكونه دعكوا 3 عربيات ورموهم فى الخرابة اللي ورا وبينهم عربية الحيوان مرسي يا شيرى
عبد الجبار : عشان تعرفي غلاوتك ...قوليلي اسم البقف ده ايه . ده امه داعيه عليه

شوشيت : اسمه عبد العزيز محمد الشرقاوي
(تليفون احمر يرن امام عبد الجبار)
عبد الجبار : طيب طيب يا شوشو انا حانفخه واجيلك باليل مووه
شوشيت : مووووووووووووووووه تقفل الخط
عبد الجبار : ايوه يا باشا اوامر معاليك
الصوت : انت يا حيوان قاعد علي ط..ظك وسايب البلد تضرب تقلب
عبد الجبار : لا يا باشا ازاي ده حتي رجالتي جابولى اسماء الناس بتوع المظاهرات النهارده وجاري مراقبتهم بس سعادتك عارف ان احنا مش عاوزين نظهر قوي واحنا بنؤدبهم عشان الصحافة والتصوير
الصوت : .س ام الصحافة اطحنهم كلهم احنا بنحمي البلد من الاوساخ دول ... قولي أي اسم كده من المحرضين دول عشان لو حد سألني ابقى عارف ارد
عبد الجبار (يفكر) : اسمه محمد الشرقاوي يا باشا.. ده بأه اكتر واحد بيضايق النظام وبيقفل عليه ... تخيل يا باشا النظام ماقدرش ينزل الصبح عشان الحيوان ده بيعاكسه ...
الصوت : يا نهار ابوه اسود .. انفخوه ...وادينى التمام يقفل الخط
عبد الجبار : اوامر وتعليمات الباشا ... (يفتح اللاسلكي) انت يا بغل ياللي نايم علي ودانك (صوت ضرب ورزع وهتافات)
صوت : تعليمات الباشا
عبد الجبار : نقولنا أي حد في المظاهرة يكون فى اسمه الشرقاوي وانفخوه
صوت : اوامر سعادتك ولو مافيش حد فى المظاهرة اسمه الشرقاوي نجيب أي حد ونغير اسمه في شهادة الميلاد وننفخه المهم رضاك عننا يا باشا
عبد الجبار : انت حمار يا بني ... تغير اسم أي حد .. بص اتصرف انت ولو هبلت انا حاغسل ايدي ومش حاعرفك
صوت : اطمئن يا باشا انا عمري ما قصرت رقبتك (يغلق الجهاز)
تليفون اسود يرن
عبد الجبار : ايوه يا انصاف عايزه ايه؟
زوجته : ابدا يا خويا اصل انت نسيت السبحة بتاعتك النهاردة في المطبخ وانت بتفطر
عبد الجبار : استغفر الله العظيم ... دى حاجه وحشه جدا , اتارينى عيني الشمال بترف يا حاجه, انا حابعت حد من العساكر يجيبها من البيت حالا
زوجته : طيب يا خويا وبالمرة خليه يجيب لنا شوية سمك بربوني عشان عايزه اعملك صينية
عبد الجبار : باذن الله تعالي حيكون عندك كمان ساعة ومعاه كل حاجة.
زوجته : ربنا يخليك لي يا حاج (تقفل)
يضرب جرس امامه ويدخل احد المخبرين
عبد الجبار : انت يا فردة الجزمة القديمة
المخبر: اوامر وتعليمات الباشا
عبد الجبار : تروح البيت تجيب السبحة بتاعتى من الحاجة وفي السكة تسقط علي أي سوق سمك وتعبي 5 كيلو سمك بربوني مفتخر .. ولو بمبك معاك أي حد تلبسة قضية مخدرات ... عالم رمم .. غور يله جاتكم الهم كلكم
(يخرج المخبر مهرولا وهو يتمتم بالفاظ غير مفهومة)
اللاسلكى : عبد الجبار باشا
عبد الجبار : ايوه اخبار المظاهرات ايه
اللاسلكى : كله تمام معاليك .. والمتهم اللى اسمه الشرقاوي مسكناه هو واصحابه وجاري التعامل يا باشا (اصوات استغاثة)
عبد الجبار : مكتوب في البطاقة شرقاوي ولا غيرت شهادة ميلاده .. ما انتوا البعدا اغبياء الله يحرقكم
اللاسلكى : كله تمام معاليك .. اسمه محمد الشرقاوي وجاري التعامل (اصوات استغاثة)
عبد الجبار : وضبوه تمام عشان يحرم ...(يقفل اللاسلكي) هو انا متضايق من الجدع ده ليه هو عمل ايه؟ يا نهار ابيض ده اسمه زي اسم البقف اللي ضايق شوشو .. يلا حظ اهله كده هو انا حعمله ايه ؟؟
التليفون الاحمر
عبد الجبار : ايوه يا باشا
صوت : الاخبار عندك ايه يا حيوان
عبد الجبار : كله تمام يا باشا ... قبضنا علي زعماء المظاهرات وجاري التعامل
صوت : انا عاوز عملية نضيفه يا عبده والا انت فاهم حركة الترقيات قربت وتقريرك حيبقي لون وشك
عبد الجبار : يا باشا انت عارف قد ايه حرصنا علي البلد , التفاني والامانة والدقة دول شعارنا ده لو فيه حد في البلد بيشتغل زي اجهزتنا ماكانش ده بقى حالنا
صوت : عفارم يا جزمه برافو عليك انا حطمن الكبار كلهم يلا غور في داهيه (يقفل التليفون)