ليه الشر ده؟؟؟

كلما انظر الي صور ضحايا الحروب وخاصة الاطفال اسأل نفسى ليه الشر ده؟ . حينما كنا اطفال كنا نتعلم ان الخير ينتصر في النهاية وبمرور الوقت والخبرات والمواقف في حياتك تكتشف ان الشر هو الذي ينتصر في هذه الدنيا وان الخير قلما يوجد. ليه الشر قوي وصوته عالي ودائما ما يهاجم كل ما هو خير؟ لماذا يموت الاطفال بلا ذنب ؟ لماذا يعذب الناس في السجون ؟ لماذا يؤذي الانسان اخاه الانسان؟ للاسف ماعنديش اجابة

يا نهار اسود 23يوليو جاي

طبعا في الاجازات كل الناس في مصر بتدور تاخد اجازة طويلة وجميلة ويوم 23 يوليو اجازة رسمية بمناسبة الثورة الميمونة . وانا كمان لسة كنت حاحجز واخد اجازة وبعدين افتكرت اني كل ما باخد اجازة فى المناسبات القومية بتحصل مصيبة. تروح سيناء مثلا وانت بتتفرج علي الفضائيات في الفندق تلاقي احلي تفجيرات وقصص عن عدم وجود اي استعدادات للمصيبة اللي حصلت يعني الجثث بتتنقل علي عربيات النص نقل وامكانيات المستشفيات لاتصلح الا ان تزود الناس ببعض الشاش والقطن ده لو ماتسببوش اصلا في موتهم. وقصص تقطع القلب عن ناس فقدوا اعز اصدقائهم او افراد عائلاتهم امام عيونهم. وتحاول ترجع القاهرة تلاقي اشاوس الامن اللي اخيرا اتحركوا قفلوا النفق وهاتك يا بهدلة في الناس ما هو ده اللي بيعرفوا يعملوه بس

وطبعا وسط الهيصة دى والدخان والاشلاء والجثث حتلاقي شوية اجانب استضافهم" التليفزيون المصري بس" بيحلفوا براس ابوهم انهم حيكملوا الرحلة بتاعتهم وانهم بعتوا بلدهم يجيبوا بقية العيله عشان ينتحروا اقصد ينبسطوا هنا هما كمان وتلاحظ ان غالبا الاجانب دول شوية عيال كومبارس تبع ريجيسير اجنبي وهما هما اللي بيتعمل معاهم الاحاديث دي بعد كل تفجير. وطبعا حيطلع في الاول واحد اهبل يقولك ان دول شوية مختلين بيلعبوا بالبمب والصواريخ فولعت فيهم لانهم مختلين وبعدها يقولك انهم من اهالي سيناء وبعد كام شهر تقراء عن مصرع احد المشتبهين في تفجيرات سيناء وهكذا الشهر اللي بعده ومانتش عارف هما كانوا كام واحد وحيفضلوا يموتوا فيهم لحد امتي وبعدين الناس تفتكر الموضوع ده في التفجير اللي بعده واهو كاس وداير والاعلام يؤكد ان الدنيا كلها كده ده حتي الموضة في اوروبا هي الارهاب

تفتكروا الواحد ممكن يطلع الاجازة الجايه وهو مطمئن وشايل كفنه علي ايده والاعمار بيد الله وخلاص. طيب تفتكروا انهم زودوا الاستعدادات الطبية حتي او اخدوا بالهم من تحذيرات اسرائيل اللي كل مرة بتحذر رعاياها لانهم مهمين عندها قبل التفجيرات بتاعتنا. مش عارف بس ربنا يستر وتعدي الاجازة الجاية علي خير، علي العموم لو حصلت تفجيرات ولقيتوني مابكتبش تاني يبقى طلعت القرافه اقصد الاجازة. احساس رائع بالامان في بلدك

احنا جدعان قوي

لي صديق احبه كثيرا وهو زميل في العمل ايضا ..ببساطة شديدة دمه خفيف وابن نكته لكن عنده مصيبة جامدة جدا, بصراحة فاكر نفسه ماحصلش عبقري وفلتة زمانه ونابغة , تسأل اللي حواليه يقولوا لك انه مش بيفهم في شغله ومش طموح ومابيحبش يتعلم وبليد و و و

الصراحة خفت علي نفسي لحسن اكون انا كمان حمار وفاكر اني ماحصلتش وفكرت شوية لقيت اني خايف علي البلد كلها لاننا دايما بنبقي فاكرين اننا ماحصلناش - راجع قصة الهرم والحضارة والتاريخ والريادة - وبنطلع في الاخر صفر علي الشمال - طبعا فاكرين صفر المونديال- الحقيقي الموضوع شغلني واستفزني قوي ازاي يبقي الواحد اعمي ومش شايف نفسه خالص ومتخيل نفسه حاجة وكل الناس شايفاه حاجة تانية , الكلام ده علي المستوي الشخصي وايضا علي مستوي البلد

مثال بسيط : وانا بتفرج علي كاس العالم كنت باسمع المعلقين العرب واقارن مستواهم بالمعلقين بتوعنا, فيه واحد منهم بيتقن الالمانية والاسبانية والايطالية بجانب الانجليزية والفرنسية طبعا, تقارن دول ببتوع الستاير والكشري اللي بيدوهم الميكرفونات للتعليق علي الماتشات تتنفخ. الفارق شاسع جدا واكيد المعلق بتاعنا ده شايف انه ماحصلش لكنه غالبا زي صاحبي اللي حكيت عليه في الاول طب ايه الحل مش عارف

مثال اخر : تسمع كلام الناس والمسلسلات العربي تحديدا عن اخلاق الحارة المصرية والاصالة والجدعنة اللي في المصريين وتدور عليها بجد , الحقيقة قليل جدا اللي اتربي اصلا -راجع قصص مرتضي منصور- وتلاحظ ان اكبر مشكلتين عندنا هما التربية والتعليم فنحن ابعد ما نكون عنهما

الخلاصة ازاي الواحد يشوف نفسه صح ؟؟؟ حد عنده اقتراحات ؟؟